2 Samuel 22

Ihubo likaDavida lokudumisa

1UDavida wahlabelela uJehova amazwi alelihubo lapho uJehova wamsindisa esandleni sezitha zakhe lasesandleni sikaSawuli.

2Wathi: “UJehova ulidwala lami, inqaba yami lomsindisi wami;

3UNkulunkulu wami ulidwala lami, lapho engiphephela khona, ihawu lami lophondo lokusindiswa kwami. Uyinqaba yami, isiphephelo sami lomsindisi wami – uyangisindisa ebantwini abalodlakela.

4Ngiyakhuleka kuJehova, ofanele ukudunyiswa njalo ngikhululwe ezitheni zami.

5“Amagagasi okubhujiswa angikhulela. Izikhukhula zokufa zaqubuka zingiphahlile.

6Izintambo zengcwaba zangithandela; imijibila yokufa yangijamela.

7Ekuhluphekeni kwami ngakhuleka kuJehova; ngakhuleka kuNkulunkulu wami. Esethempelini lakhe walizwa ilizwi lami; ukukhala kwami kwafika ezindlebeni zakhe.

8“Umhlaba wagedezela wazamazama, izisekelo zamazulu zanyikinyeka; zagedezela ngoba wayethukuthele.

9Intuthu yalanquka emakhaleni akhe; umlilo oqothulayo waphuma emlonyeni wakhe, amalahle avuthayo alavuka ephuma kuwo.

10Wehlukanisa amazulu wehlela phansi; amayezi amnyama aba ngaphansi kwezinyawo zakhe.

11Wagada amakherubhi waphapha; waqonga phezu kwamaphiko omoya.

12Wenza umnyama waba yisigubuzelo esimhanqileyo – amayezi ezulu amnyama asemkhathini.

13Ekukhanyeni kobukhona bakhe, izikhatha zombane zalavuza khona.

14UJehova wakhwaza esezulwini; ilizwi loPhezukonke lanqenqetha.

15Watshoka imitshoko wazihlakaza izitha, izikhatha zombane njalo zaziqothula.

16Izigodi zolwandle zambulwa lezisekelo zomhlaba zavezwa obala ekukhuzeni kukaJehova, ekufutheni komoya wamakhala akhe.

17“Wafinyelela phansi evela phezulu wangibamba; wangenyula emanzini atshonayo.

18Wangihlenga esitheni sami esilamandla; ezitheni ezazilamandla kakhulu kulami.

19Zajamelana lami ngosuku lwencithakalo yami; kodwa uJehova waba yinsika yami.

20Wangikhupha wangibeka endaweni ebanzi; wangihlenga ngoba wayethokoza ngami.

21“UJehova wangiphatha ngokufanele ukulunga kwami; wangivuza ngokufanele ukuhlanzeka kwezandla zami.

22Ngoba izindlela zikaJehova ngizigcinile; angenznga bubi bokufulathela uNkulunkulu wami.

23Yonke imithetho yakhe iphambi kwami; angizifulathelanga izimiso zakhe.

24Angibanga lesici phambi kwakhe njalo ngisixwayile isono.

25UJehova ungivuze ngokufanele ukulunga kwami; okufanele ukuhlanzeka kwami phambi kwakhe.

26“Kothembekileyo uzibonakalisa uthembekile; kongelasici uzibonakalisa ungelasici,

27kohlambulukileyo uzibonakalisa uhlahlambulukile, kodwa kongaqondanga uzibonakalisa ukhaliphile.

28Uyabasindisa abathobekileyo; kodwa amehlo akho aphezu kwabazigqajayo ukuba ubehlisele phansi.

29Uyisibane sami, O Jehova; uJehova uguqula umnyama wami ube yikukhanya.

30Ngosizo lwakho ngingalilanda ibutho ngijamelane lalo, ngoNkulunkulu wami ngingawukhwela umduli.

31“Yena uNkulunkulu, indlela yakhe iphelele; ilizwi likaJehova kalilasici. Ulihawu labo bonke abaphephela kuye.

32Ngoba uNkulunkulu ngubani ngaphandle kukaJehova? Njalo iDwala ngubani ngaphandle kukaNkulunkulu wethu na?

33NguNkulunkulu ongihlomisa ngamandla enze indlela yami iphelele.

34Wenza izinyawo zami zibe njengezinyawo zempala; ungenza ngime ezingqongweni.

35Ufundisa izandla zami ukulwa impi, izingalo zami zingaligobisa idandili lethusi.

36Uyanginika ihawu lakho lokunqoba; ukhothamela phansi ukuba ungenze ngibe mkhulu.

37Uqhelisa indlela phansi kwami ukuze amaqakala ami angapheci.

38“Ngaxotshana lezitha zami ngaziqothula; angibuyelanga emuva zaze zachithwa.

39Ngaziqothula okupheleleyo, njalo zazingeke zisavuka; zawela ngaphansi kwezinyawo zami.

40Wangihlomisa ngamandla okulwa impi; wenza izitha zami zakhothama ezinyawenu zami.

41Wenza izitha zami zafulathela zabaleka, njalo ngazichitha izitha zami.

42Bakhalela usizo, kodwa kakho owayengabahlenga – kuJehova, kodwa kabaphendulanga.

43Ngabatshaya bacoleka njengothuli lomhlabathi; ngabagxoba ngabanyathela njengodaka ezindleleni.

44“Ungikhulule ekuhlaselweni ngabantu bami; ungigcine ngiyinhloko yezizwe. Abantu engangingabazi bangaphansi kombuso wami,

45labezizweni beza betshotshobele kimi; bathi bengizwa nje, bangilalele.

46Bonke badelile; beza bethuthumela bevela ezinqabeni zabo.

47UJehova ukhona! Kalidunyiswe iDwala lami! Kaphakanyiswe uNkulunkulu, iDwala, uMsindisi wami.

48UnguNkulunkulu ongiphindiselelayo, obeka izizwe ngaphansi kwami,

49ongikhululayo ezitheni zami. Wena wangiphakamisela ngaphezu kwezitha zami; wangihlenga ebantwini abalodlakela.

50Ngakho-ke ngizakubonga, O uJehova, phakathi kwezizwe; ngizahlabelela indumiso ebizweni lakho.

51Unika inkosi yakhe ukunqoba okukhulu; ubonakalisa uthando lwakhe olungapheliyo kogcotshiweyo wakhe, kuDavida lenzalo yakhe kuze kube phakade.”